Guruhlardagi mavzular, kolleksiyalanadigan foydalanuvchi nomlari, video xabarlar uchun ovozni matnga aylantirish va boshqalar

Bugungi yangilanishda katta guruhlarda muhokamalarni tartiblashda yordam beradigan mavzular, xavfsiz blokcheyn orqali xarid qilish mumkin boʻlgan yangi kolleksiyalanadigan foydalanuvchi nomlari, video xabarlarni matnga aylantirish imkoniyati va boshqalar taqdim etiladi.

Guruhlardagi mavzular

Telegram guruhlari yuz minglab foydalanuvchiga ega yirik hamjamiyatlarni dastaklaydi. Bu chatlarni oʻqish oson boʻlishi uchun 200 tadan ortiq aʼzoga ega guruhlar endi mavzularni yoqishi va istalgan mavzu uchun alohida maydon yaratishi mumkin.

Yangi funksiya turli savollar muhokamasini asosiy guruh ichida turli chatlarga boʻlish imkonini beradi. Har bir mavzu uchun yangi xabarlar haqidagi bildirishnomalarni alohida sozlash va ularda joylangan medialarni (“Umumiy media”) koʻrish mumkin. Ishtirokchilar soʻrovnomalar, qadalgan xabarlar va botlar kabi barcha sevimli funksiyalaridan foydalangan holda “Anime”dan tortib “Zoologiya”gacha istalgan mavzuda suhbatlashishi mumkin.

Bu funksiya katta guruhlar uchun maxsus yaratilgan. Ular chatlarni alohida sozlashning yangi imkoniyatlarini ochadi va muhokamalarga qiziqishni ushlab turishga yordam beradi. Yil oxirigacha kichik guruhlar uchun alohida vositalar majmuasini tayyorlashni ham rejalashtirmoqdamiz. Mavzularni ushbu ommaviy guruhimizda sinash mumkin.

Guruh adminlari mavzularni Guruh sozlamalarida yoqishi va Ruxsatlar ruknida kimlarga mavzular yaratish va boshqarish ruxsati berilishini boshqarishi mumkin.

Telegramda har doim boʻlgani kabi kelgusi yangilanishlarda ushbu funksiya adminlar va foydalanuvchilar uchun qoʻshimcha qulay vositalar bilan boyitiladi.

Kolleksiyalanadigan foydalanuvchi nomlari

Telegram foydalanuvchilari foydalanuvchi nomlari orqali boshqalar ularga bogʻlanishi yoki ommaviy guruh va kanallarini topishini osonlashtirishi mumkin. Endi hisob va ommaviy chatlaringizning har biriga kolleksiyalanadigan foydalanuvchi nomlarini biriktirishingiz mumkin.

Kolleksiyalanadigan foydalanuvchi nomlariga egalik tezkor va masshtablanuvchi blokcheyn – TON bilan ishonchli himoyalanadi. Fragment yangi platformasi – Telegramdagi hisob yoki chat uchun qimmatli havolalarni xarid qilish va sotuvga qoʻyish mumkin boʻlgan oddiy va xavfsiz maydondir.

Kolleksiyalanadigan foydalanuvchi nomlari xuddi oddiy foydalanuvchi nomlari – @username kabi ishlaydi: ular global qidiruv natijalarida chiqadi va Telegram tashqarisida foydalanish mumkin boʻlgan username.t.me va t.me/username shaklidagi oʻz havolalariga ega.

Video xabarlar uchun ovozni matnga aylantirish

Telegram Premium ishga tushirilganidan buyon obunachilar istalgan ovozli xabarni tinglashdan koʻra oʻqish qulayroq boʻlgan holatlar uchun matnga aylantira olish imkoniyatga ega boʻlgan edi. Bu yangilanishda ayni funksiya video xabarlarga ham qoʻshildi. Bu Premium foydalanuvchilarga tezkor matn transkripsiyasini olish imkonini beradi.

Yangi emoji toʻplamlari

Minglab foydalanuvchilar maxsus emoji toʻplamlarini yaratishni qiziqish bilan sinab koʻrmoqda. Ulardan Telegram rassomlari ham ortda qolmayapti: ular ushbu yangilanishga 12 ta yangi emoji toʻplamini tayyorlashdi. Premium foydalanuvchilar ushbu emojilardan istalgan xabar va izohlarda foydalanishi yoki ularni Xellouin uchun statuslar sifatida belgilashi mumkin:

iOS uchun ilovada yangi dizayndagi tungi rejim

iOS uchun ilovada tungi mavzu dizayni yangilandi: yanada muvozanatlangan ranglar birikmasi tanlandi hamda xabarlar va chatlar roʻyxatini varaqlashda xiralashtirish effekti yaxshilandi.

Android uchun ilovada matn oʻlchamini oʻzgartirish

Android uchun ilovadagi “Chat sozlamalari” menyusida matn oʻlchami oʻzgartirilsa, barcha chat matnlari, jumladan, havolaga razm solish ekrani, xizmat xabarlari va boshqalar oʻlchami ham oʻzgaradi.

Dizayndagi kichik yaxshilanishlar

Javob berish uchun chapga surganda endi yangi animatsiya hamrohlik qiladi. Foydalanuvchi profilida uning telefon raqamiga bosilsa, bir nechta chaqiruv variantlariga ega yangi menyu ochiladi. Telegram chatni darhol yuklashga ulgurmaydigan kamdan-kam holatlarda esa xabarlar oʻrniga yangi pulsli animatsiya bilan matn bloklari chizgilari paydo boʻladi.

Yangi interaktiv emoji va reaksiyalar

Suhbatdoshingizga oʻqish bilan bandligingiz, uxlayotganingiz yoki nimadandir shubhalanayotganingizni xabar qilishda yakkama-yakka chatlarda 4 ta yangi interaktiv emoji yordam beradi. Ularda butun ekranli animatsiyalar ijro etiladi va ulardan reaksiyalar sifatida ham foydalanish mumkin. Shu bilan birga, Xellouin munosabati bilan barcha foydalanuvchilar istalgan chatda 3 ta mavzuli reaksiyadan foydalanishi mumkin.

Buguncha shular. Mavzular guruhida koʻrishguncha. Apple yangilanishni tekshirish uchun ikki hafta vaqt sarflagani tufayli bu yil Xellouinni oʻz vaqtida nishonlay olmaganimiz uchun uzr soʻraymiz.

Bu haqida batafsil va biz bunga qarshi qanday kurashishimiz mumkinligi haqida asoschimizdan ushbu postni oʻqishingiz mumkin.

2022-yil, 5-noyabr
Telegram jamoasi