Yaxshilangan chaqiruvlar, yangi oʻchirish animatsiyasi va botlar uchun yirik yangilanish

Telegramning 2023-yildagi 10-yangilanishida telefoningiz batareyasidan kamroq foydalanadigan rangli yangi dizayn bilan yaxshilangan chaqiruvlar, xabarlarni oʻchirganingizda yangi bugʻlanish effekti, Telegram tarixidagi eng katta botlar yangilanishi va boshqalar taqdim etiladi.

Yangilangan chaqiruvlar

Telegram chaqiruvlari foydalanuvchilarga suhbatlashish, kamerasini yoqish yoki ekranini namoyish qilish imkonini beradi — va bularning hammasi bitta ilovada. Chaqiruvlar barcha platformalarda mavjud va boshidan oxirigacha shifrlash bilan himoyalanadi.

Bu yangilanishda chaqiruv qilinayotganda, faolligida va tugaganida dinamik tarzda oʻzgaradigan yangi animatsiyalar va chiroyli fonlar bilan dizayn toʻliq qayta yangilandi. Yangi interfeys avvalgiga qaraganda kamroq resurslarni talab qiladi. Natijada batareya xizmat muddati uzayadi va eskiroq qurilmalarda yaxshiroq ishlaydi.

Shuningdek, biz ilova ishlashi va interfeysdagi yuzlab xatoliklarni tuzatdik va chaqiruv sifatiga ayrim yaxshilanishlarni qoʻshdik. Bundan tashqari, ulanish barqarorligi va ovoz sifatini qoʻshimcha yaxshilash ustida ishlamoqdamiz — ushbu oʻzgarishlar ilovada 2024-yilda paydo boʻladi.

Xabarlarni oʻchirganda “Tanos chertkisi” effekti

Oʻtgan oyda biz iOS uchun ilovada avtomatik oʻchadigan xabarlar uchun tajribaviy bugʻlanish animatsiyasini qoʻshgan edik.

Bu ajoyib (va energiya tejamkor) animatsiya endi iOS va Android ilovada mavjud hamda endi istalgan xabarni oʻchirganingizda ijro qilinadi.

Misli koʻrilmagan botlar yangilanishi: reaksiyalar va boshqalar

Telegramning bepul botlar yaratish platformasi dasturchilarga oddiy chat botlaridan tortib istalgan veb-sayt oʻrnini egallaydigan kuchli mini ilovalargacha har qanday turdagi xizmatni Telegram ekotizimiga integratsiya qilish imkonini beradi.

Biz bu yilni botlar yaratish platformasiga Telegram tarixidagi eng katta yangilanish bilan yopmoqdamiz. Yuzlab yangi funksiyalar orasida botlar endi xabarlarga reaksiya bildirishi hamda reaksiyalar, iqtiboslar va havolalarni boshqarishi, boshqa chatlar yoki mavzularga javoblar yuborishi mumkin.

Bu yangilanishda botlar ular admin boʻlgan kanallarda yutuqli oʻyinlar natijalaridan va foydalanuvchi ovoz bergan yoki bermaganidan xabardor ham boʻladi.

Dasturchilar ushbu misli koʻrilmagan oxirgi oʻzgarishlar roʻyxatida botlar yaratish uchun platformaga kiritilgan barcha oʻzgarishlarni topishi mumkin.

Agar botlar va kichik ilovalar yaratishga qiziqsangiz, Botlar qoʻllanmamiz bilan tanishing, unda qoʻshimcha maʼlumotlar va hatto yangi boshlovchilar uchun qadamma-qadam qoʻllanmani ham topishingiz mumkin.

Bu yangilanish yana boshqa funksiyalarni ham oʻz ichiga oladi, lekin sizga bular haqida yanvar oyida maʼlumot beramiz. Hozircha doʻstlaringizni tabriklash uchun chaqiruv qiling yoki bu ishni siz uchun bajaradigan bot yarating. Tez orada yangi yilda koʻrishguncha!

2023-yil, 31-dekabr
Telegram jamoasi